تقول ( فقدت امي منذ خمسة اشهر )

من طرف **الثلج الاسود** الإثنين مايو 26, 2014 8:38 am

هذه مشكلة مستني فاحببت ان انقلها لكم وستحسون باحساسها

تقول الاخت

السلام عليكم ورحمة الله وبركاته

صراحة مو عارفة كيف ابتدي الموضوع العنوان بلحالة مؤلم بس كتابته

أنا امي رحلت من هالدنيا قبل 5 شهور بعد 3 سنين معاناة من المرض الشين الله يكفيكم شره

لسه مو مستوعبة ولا ابي استوعب ،، شعوري احس اني مو موجودة في هالدنيا زي ما تقولون (زومبي)

جسديا بس عقلي وروحي ميتين ،، علاقتي في امي مثل الرولر كوستر بس احبها حب ما اقدر اوصفه لكم

يعني كل الكون في كفة وامي في كفة ثانية اعترف اغلب مشاكلي معاها انا كنت سببها مرحلة المراهقة

والافلام كانت مستمرة عندي بزيادة هههه بس سبحان الله ماحد كان يصدقني لما اقوله انه مع مشاكلي

معاها اول شخص اشتكيله كان هي وكانت بير اسراري والله اقولها اي شي من دون خوف ولا تردد

بيتنا ابد ما فيه استقرار الحين كل واحد فينا مع ابوي كلن في غرفته مع نفسه ناكل لحالنا ونقعد لحالنا

حاولنا كلنا انه لازم نتغير بس سبحان الله كان تجمعنا معها وعشانها بس من راحت واحنا ما نحس

باستقرار ،، حاولت كذا مرة اروح لدكاترة نفسيين لما اجي اتكلم اقعد طول الوقت اصيح ما يفهمون مني

شي ،، احيانا تجيني افكار سوداوية وسوء الظن في الله (ادري استغفر الله بس اللي عاش وضعي

بيفهمني) أنا اكبر اخواني فلكم ان تتخيلوا وش احس فيه الحين امي كانت مريحتنا عل آخر مدري الحين

وش الدبرة في ولا شي ،، قررت ابدى اقرا قرآن واختم البقرة كل ليلة بس بصراحة بعد شهر لسة ما

حسيت بأي نوع من الراحة النفسية اللي اسمع عنها فبطلت ،، دايما امسك جوالي وادق عليها ابي

اسمع صوتها ضحكتها صراخها معليش راضية بس ابي حسها يكون في الدنيا ،، من أكثر الكلمات اللي

استفزتني ايام العزا (الحمدالله ارتاحت الحين) بس احنا عيالها ما ارتحنا ! ادري اني انانيه بس زي ما

قلتلكم اللي ما مر في اللي انا قاعدة امر فيه مستحيل يفهم انا وش اقصد انا ما اتخيلها مو موجودة

في زواجي في ولادتي في حياتي عامة ماحد يقدر يتخيل امه مو موجودة ولاحد يقدر ياخذ مكانها

سبب كتابتي للموضوع انه دورت في النت على مواضيع بنات امهاتهم توفوا ابي اشوف وش شعورهم

هل مشاعري طبيعية ولا اعاني من مرض نفسي ومو حاسة .. اتمنى من اللي حابب يعلق على الموضوع

لا ينسى نفسه ويقعد يكتبلي قصيدة عن كيف ما يتخيل الحياة من دون امه ويتمنى الموت قبل ما يشوف

هاليوم لأن انت/انتي ما تدرون هاذا وش يسوي لنا كلنا نحس ونتمنى اننا متنا ولا عشنا وشفنا هاليوم

لانه اصعب مما تتخيلونه ولو تطلبون مني وصفه بكلمات ما اقدر

دمتم بود

.

من طرف **الثلج الاسود** الإثنين مايو 26, 2014 8:41 am

اليكم اجمل الردود لها

ياحبيبتي أنتِ
أسأل الله أن يرحمها ويغفر لها ويجعل ما أصابها تكفير لها .
والله يعظم أجركم و يجمعكم معها في مستقر رحمته .
أول شي أبيه منك وأنتِ تقريد ردي قولي : اللهم لك الحمد كما ينبغي لجلال وجهك وعظيم سلطانك .
5 شهور غير كافيه إنك تستوعبين الوضع .. والله حاسه فيك :" !
عشان كذا إحمدي الله كثيراً .. لأن هاذي مرحله ورح تتعودين تتعايشين مع هالوضع .
ورح تقولين ياليتني صبرت وإحتسبت .. يمكن أفضل مافي المصائب اللي تواجهنا هو الأجر اللي ناخذه من صبرنا عليها .
طبعاً مايحتاج أوصيك بالدعاء والصدقه انتِ عارفه فضلها .. رح تحسن إنها جسر يربطك بأمك .
كل ما حسيتي نفسك مخنوقه إخذي نفس عميق وقولي لا إله إلا الله لتطمئن نفسك .
إقرأي القرآن بترتيل .. وإذا ما إرتحتي بالقراءه إسمعي لأحد المشايخ اللي تحبين أصواتهم <-- لأن سماع القرآن يُعتبر عباده بعد .
ولا يجي في بالك إن أنتِ فيك حاله نفسيه لأن فاقده أمك إلى هذا الحد !
لا ياقلبي إنتِ بسم الله عليك هذا شي طبيعي , إنتِ بس استعيني بالله وماراح يخيبك .
وآخر شي بقولك إن أحسن شي في مصيبة الموت إنه الشي الوحيد اللي يخلينا قريبين من قول الرسول صلى الله عليه وسلم -فيما معناه -: ( عش في الدنيا كانك غريب أو عابر سبيل )
بإذن الله بتلتقين فأمك لقاء لا يتبعه فراق .

الثاني

الحمدلله الذي لايحمد على مكروه سواه
حنا اذا نحب شخص بنعطيه كل مانقدر عليه صح؟
طيب واذا كان هالشخص هو احد والديننا معناه ياسلام هذا بر والدين وموصي عليه الله سبحانه في كتابه والمصطفى في أحاديثه
انتي الحين متضايقه انك فقدتي هالحبيبه ؟
طيب الفرصه لازالت موجوده انك تعبرين عن حبك لها بالدعاء لها
لانها انتقلت للحياه أخرى حياه مافيها عمل . مو منتظره منك بكاء وضيقة صدر
هي تنتظر دعائك لها يجيها مثل الهديه لاتخذلينها .
ولاتنسين ان امك توفت بالمرض يعني اجرها عظيم بأذن الله عند رب العالمين . يعني الخيره فيما اختاره الله
ربي اختار لها هالمرض آخر حياتها علشان يكفر عنها سيئاتها.
وانتي لاتنسين انك مأجوره على فقدك لأمك وصبرك
تعوذي من الشيطان الرجيم اللي يصور لك الدنيا بمنظر اسود ويبث افكاره ان الدنيا توقفت بعد امك
لا ترى موب صحيح .كثير يفقدون غالين ويصبرون ويدعون لهم
يآخذون هم أجر الصبر والمتوفين ياخذون دعائهم
جميل انك كتبتي الموضوع علشان الفضفضه .
لكن من اليوم كل مره تشتاقين لهآ ادعي لها مباشره
لأنك عالطول بتحسين انك قدمتي لها دعاء هي محتاجته
والا الدموع ماراح تفيدها بشي !
وانتي لانك تحبينها ضروري تدورين على اللي يرضيها ويفيدها.
بالنسبه لكلامك انك مو متخيله ان امك ماتحظر زواجك ولا ولاادتك ترى كل هالأفكار تجي من ابليس
علشان يغمك زياده لاتتركين له المجال
ترى ابليس يلقى بعقول بعض البشر بيئه خصبه بسبب ضعف الايمان بالقضاء ةالقدر
انتي ادعي ربي يصبرك ويقذف بقلبك الطمئنينه وكثري الطاعات , بترتاحين بأذن الله
وبعدين ترى الموتى يحسون ويجون بالمنام .
يعني انتي افرحي كأنها تشوفك بالضبط بقولك قصة امي
(كانت بتولد وكانت هذي الولاده اول ولاده بعد وفاة امها الله يرحمها وبيوم من ايام الشهر التاسع حلمت انها جايه
وجايبه معها شاهي تقول اشربي هذا زين لك وهي كنها متحمسه تقول قمت من النوم وفيني بداية ولاده
يعني حست فيها وهي متوفيه .! والا شلون جت بالحلم وهي عارفه ان امي بتولد اليوم وامي بنفسها ماتدري؟ والله اعلم,)
وغير كل هذا هل كل الافكارالسيئه كثرة دورانها براسك راح تغير من الواقع شي ؟
لا
اذاً لنفسك عليك حق .
الله يرحم امك ويغفرلها ويطمن قلبك

الثالت

والله يا رفيقه ليس بالأمر الهيّن أن نفقد شخص غالي و مهم في حياتنا كالوالدين
و مهما قِيل لكيّ من كلمات لطيفه و مهما ربت على كتفك من أيادٍ حنونه
سيضل ألم الفراق متسع في قلبكِ و لكن هذة هي الحياة و كلنا لن نكون في الغد
لأننا سنزول كما زال من قبلنا و سيجمعنا الله في جنته بإذنه
الأهم الآن أن لا تبكي على أطلال الماضي ما حدث إنتهى و لن تغيّري فيه شيء
و كله بيد الله فكريّ هل سترضى والدتكِ في حال إستمراركِ على هذة الحالة البائسه
أو ماذا تستفيدين حين تهمليّ نفسك المسؤله عنها و تجلديّ ذاتك و تعاقبيها
أيضًا أنتِ الكبيرة يجب أن تتحمليّ المسؤليه تجاه والدكِ و إخوتك و يجب أن تكونيّ أقوى
و أنتِ قادرة على تغيّر نمط حياتك إلى نمط أجمل و مختلف

رحم الله والدتكِ و جمعكِ و ذويكِ بها في مستقر رحمته

.

تقول ( فقدت امي منذ خمسة اشهر )

تقول ( فقدت امي منذ خمسة اشهر )

رد: تقول ( فقدت امي منذ خمسة اشهر )