زوجتي مره مدلعه

مساء الخير

أنا رجال عمري 30 سنه قدر الله علي و تزوجت لي أربع شهور متزوج ...

بعد ما رجعت من شهر العسل .. و عشت مع زوجتي في شقة .. بدأت أحس أنها تتذمر .. حتى أكون منصف .. البنت نظيفة و مرتبه و تهتم بنظافة البيت و تطبخ .. لكن إكتشفت أنه ما يرضيها شيء!

أنا أشوف الشباب اللي متزوجين حديثاً و وضعهم مع زوجاتهم .. خاصة الوضع المادي .. يكون عادي ..

أنا أعرف شباب يقولون لو يشترون لزوجاتهم هدية بسيطة بـ ألف أو ألفين .. طارت من الفرحة ! و ما يشترون لهن هدايا إلا بالسنة مره ..

أنا ما أقصر عليها بشيء .. لأن راتبي عالي .. آخر مره أشتريت لها شنطة بخمس اللأف ريال ..

بكل صراحة .. بدت تحسسني إني أقل من غيري من الرجال من ناحية المادة .. مع إني أنا عارف نفسي و أعرف أحوال الشباب هاليومين .. راتبي يعتبر عالي .. و وضعي ممتاز .. لكن لأنها موب قنوعة ..

أنا بطبيعتي من أسرة مكافحة .. أبوي ولد يتيم و فقير لين طلع نفسه .. و أنا تعودت على الكفاح بالحياة و أخذ الحياة بجدية حتى أصنع نفسي .. أنا لا عندي واسطات .. و لا شيء .. فتعودت أني أثبت نفسي بنفسي .. لين وصلت مركز يعتبر جيد بالنسبة لسني .. و سافرت و درست .. و رجعت و مسكت منصب كويس ..

آخر مره فاجأتني بكلام غريب .. قالت : أنا كنت عايشه أفضل في بيت أهلي .. في بيت أهلي لا أطبخ و لا أغسل .. و عندي سواق دايماً تحت أمري !

للمعلومية .. أنا ما عمري طلب منها لا تطبخ و لا تغسل .. بالعكس أقول لها نجيب أكل من برا بحكم أننا كلنا موظفين .. تقول ما أحب أكل برا ..

أنا بصراحة تضايقت من كلامها .. و صارت في خاطري ..

و بدأت أتسأل عن حياتنا في المستقبل ..

البنت لها صفات إيجابية كثيرة .. و لها صفات سلبية ..

لكن بعض تلميحاتها عن وضعنا و حياتنا الآن و مقارنتها في حياتها في بيت أهلها .. و إحساسي القوي بأنها موب قنوعة .. خلاني شوي أكش منها ..

و أحياناً تجلس تسوف عن جماعتهم و كأنهم من كوكب آخر !

سبحان الله كلهم مطيعين لحريمهم ... و كلهم مدلعين حريمهم .. و كلهم ما يسافرون إلا مع حريمهم !

أنا الصراحة ما أعرف كل جماعتهم (حنا من عائلتين مختلفتين) لكن صار كلامها عن جماعتهم في رأسي .. و صار لدي رغبة أتعرف على ناس من جماعتها عشان أشوف الرجال الملائكيين ذولا ..

لكن خوفي يطلع كلاهما كذب و أقلب عليها قلبة محترمه و أعلمها كيف تصور لي أشياء موب واقعية ..

و المشكلة أني نبهتها أن أكثر البنات نصابات .. يمثلن السعادة .. و يكذبن و يقولون زوجي فعل لي و زوجي أشترى لي .. و زوجي جاب لي و زوجي حط لي .. و هو و الله زوجها ما عطاها وجه .. ما غير يا على النت يا يتابع كوره يا بإستراحة .. أنا مداخل الشباب و أعرفهم و عارف وضعهم كيف .. لكن أحسها تتأثر من البنات النصابات ...

مره صار موقف .. قالت لي أن صديقتها و زوجها ودهم يروحون إيطاليا و ما حصلوا موعد بالسفارة .. أنا أعرف القنصل الإيطالي شخصياً قلت لها أنا أكلم لهم القنصل الإيطالي .. و أشوف إمكانية أنه يمشي جوازين بدري .. كلمت صديقتها و قالت زوجي كلم القنصل و يبي يمشيكم .. تخيلوا وش قالت صديقتها : معليش صار عندنا ظروف و ما راح نقدر نسافر .. طبعاً كله كذب و نصب .. أساساً ما كان عندهم نية يسافرون .. لكنه مرض نفسي منتشر في المجتمع و بعض البنات الغبيات يصدقن ..

وفيه مشكلة ثانية .. هي أننا ما بيننا لغة حوار ..

أنا نشأت في بيئة النقاش و الجدال فيها شيء طبيعي جداً .. ممكن واحد يقول لنا سالفة .. نجلس نناقشها .. و نبين أن السالفة كلها كلام فاضي بناء على معطيات .. يعني حنا ما نسمع السواليف و نهز روسنا و نقول "الله الله" و إلا نصدق أي شيء .. هذا طبع فينا ..

أذكر مره كانت تقص علي سالفة واحد من قرايبها صارت له مشكلة في أحد الدوائر الحكومية .. طبعاً تروي القصة عن أمها .. و أمها ترويها عن خالتها ..

المهم .. قلت لها السالفة موب دقيقة .. و شرحت لها النظام بحكم عملي .. و قلت شكل اللي قال لكم السالفة فاهم غلط .. (لا حظو ما كذبتها و لا كذبت أمها قلت اللي قال لكم السالفة فاهم غلط)

اللي حصل .. أن البنت زعلت و قالت أن تقول أنا كذابه ؟ سلامات !؟

صار أي موضوع عام تنتاقش فيه يتحول إلى مشكلة .. لأني من بيئة متعودة على النقاش .. و هي من بيئة ما يصير بينهم أي نقاشات .. و أغلب كلامهم يا مزح يا إستهبال ..

بشكل عام .. أنا موب مرتاح في زواجي .. ما أحس إن هذي البنت اللي ابغى أرتبط فيها و تكون شريكتي في الحياة بكل صعوباتها و مشاقها ..

أحياناُ يوسوس لي إبليس و أقول خل ننفصل بس .. لكن سمعت من ناس كبار أن هذا طبيعي في أول أشهر الزواج بحكم أننا كل واحد جاي من بيئة و بيت مختلف و له طباع تختلف عن الآخر ..

لكن مدري .. أحس فيها أمور و طباع مستحيل تتغير .. و أنا ماني متفائل كثير !

بالنسبة لي .. لو البنت تقتنع بأن حياتها في بيت أهلها شيء .. و في زوجها شييء ثاني و ما فيه مجال للمقارنة ..

و تكون قنوعة .. و تستمع بأي شيء مهما كان بسيط أو غالي ..

و تتعلم لغة الحوار .. أو على الأقل تتفهم طريقتي بالنقاش (تعتمد على المنطق) و ما تزعل .. كان صار ما فيه زيها ..

لكن ما فيه أحد كامل ..

أنا مدري وش أسوي الآن .. هل فيه طريقة معينة أتعامل بها ؟

أنا جلست معها أكثر من جلسة مصارحة لكن بدون فايدة .. الظاهر اللي فيها طبع !

أنا مانيب أردى الرجال .. و أستحق حياة أفضل ..

و آسف عن الإطالة و اللخبطة بالمشكلة

زوجتي مره مدلعه

زوجتي مره مدلعه

رد: زوجتي مره مدلعه